Marka eta errekor guztiak apurtu ditu aurtengo Karakaterako Igoerak: denborarik onenarena, partaidetzarena eta baliteke ikusle kopuruarena ere. Aritz Kortabarria irabazlea 29 minutu justuan iritsi da Plaza Handitik (42 m.) Karakateko tontorreraino (764 m.). Susoren errekorra 43 segundutan hobetu du 24 urteko arrasatearrak. Guztira 38 lagunek parte hartu dute eta Ibon Gabilondo izan da lehen elgoibartarra (32:02).

1997tik Jose Mari Fernandez "Suso" elgoibartarraren esku zegoen errekorra (29:43) gainditu du Haritz Kortabarria arrasatearrak. Bidea ez ezagutzea ez da oztopo izan. Bai, ordea, Ionut Zinka Gasteizen bizi den jatorri errumaniarreko mendi korrikalari ezagunarentzat. Pare bat aldiz galdu ostean, hirugarren postuan iritsi da, proba irabazteko faboritorik argiena zirudiena. Lehen elgoibartarra Ibon Gabilondo izan da. Honek 32:02-ko denbora ezarri du helmugan, bere markarik hoberena baino 2 segundu gehiago, alegia.

Partaidetza Errekorra

38 lagunek parte hartu dute aurten, inoiz izan den partaidetzarik handiena. Iaz 30 lagunek egin zuten igoera.

Inoiz baino antxintxikari gehiago, 31 lagun, bildu ziren Plaza Handian Karakaterako igoera gogorrari aurre egiteko. Hauetatik 14 elgoibartarrak eta gainontzekoak Euskadiko hiru probintzietatik etorriak. Rodisan lan egiten duen Mikel Albeniz donostiarra izan zen Karakatera igotzen bizkorrena. Trintxerpe klubeko korrikalariak 31 minutu eta 5 segundu erabili zituen 700 metroko desnibela gainditzeko. Lankideen animuei kasu eginez, eta astebete lehenago Behobia-Donostian egin zuen 1:10:08 denborak ematen zion konfidantza eta sasoi puntuak bultzatuta parte hartu zuen.

Lehen elgoibartarra, Jose Mari Fernandez, probako dominatzaile nagusia izan zen beste behin. Azken urteetako denboretan mantendu zen “Suso”, 32 minutuko denborarekin. Lasaitu ederra hartu zuen 96an ezarri zuen errekorrak bere horretan jarraituko zuela egiaztatzean. Partaidetza errekorra ez ezik (aurrekoa 20 lagunetan zegoen), Karakaten eta Plaza Handian bildu ziren ikusle kopurua aipagarria izan zen. Aste euritsuaren ostean egun fresko baina eguzkitsua atera zen, eta ikusle asko animatu zen Karakatera oinez igotzera.

Santi Maiztegi elgoibartarrak irakatsi zizkion hartu beharreko bidezidorrak, baina goi aldekoak bakarrik. Dena dela, hasieratik jarri zen buruan eta denbora aparta egin zuen tontorrean: 30'42”. 35 urteko azpeitiarra sasoi puntu ezin hobean iritsi zen elgoibarrera, astebete lehenago 1:07'22” denbora lortu baitzuen Behobia-Donostia lasterketan, 50. postuan sailkatuz.

Azken edizioetan Susoren errekorrera (29'43”) gehien hurbildu den parte hartzailea izan da Arregi eta datorren urtean ere etortzeko intentzioa duela adierazi zuen. Iaz moduan Ibon Gabilondo sailkatu zen bigarren postuan. Triatloietan aritzen den elgoibartarrak 32 minutu justu behar izan zituen 700 metroko desnibela gainditzeko, iaz baino 39 segundu gutxiago. Hirugarren postuan Jose Mari Fernández “Suso”, igoera zazpi alditan irabazi duen probako dominatzaile nagusia sailkatu zen, iazko denbora berdina eginez. Bere errekorra arriskuan ikusi zuen Susok eta hala adierazi zuen tontorrean, baina oraingoz bera izan da lasterketa batean Karakatera bizkorren igo den gizasemea.

Guztira 16 aintxitxikarik parte hartu zuten eta Karakate gainean bildu zen jende mordoaren animoak jaso zituzten. Aurreko egunetan eginiko euriaren eraginez basa asko topatu zuten bidean, baina aintxitxika egiteko egun aproposa eduki zuten.

Urtebete pentsatzeko

   Juan Cruz Montes eta Ibon Gabilondo herritarrak izan ziren "Suso" hurbiletik jarraitzeko gai izan ziren bakarrak. Azken txnpan Gabilondok Montes pasa zuen eta "Suso"rengandik 27 segundura sailkatu zen. 25 urteko elgoibartar honek parte hartzen zuen bigarren aldia zen eta etorkizunean "Suso"rentzat kontutan hartzeko lehiakidea izan daitekeela erakutsi zuen. Izan ere, garaipenaren ostean, "Suso"k ez zuen argitu bere agur lasterketa izan zen edo ez. Urtebete duela pentsatzeko adierazi zuen, irabazi ostean zaila baita agur esatea. Guztira 16 partaideak eman zuten izena, denak gizonezkoak. Karakate gaina, berriz, ikusminak erakarritako ikuslez gainezka egon zen. Autoz, bizikletaz eta oinez igo ziren herritar asko. Tontorrean haize hotzak egin zien agur, baina partehartzaileak ez zuten hotz gehiegirik pasa, motorrak bero-bero zituztela iritsi baitziren.

Partaidetza errekorra

Aurtengo igoerak inoiz baino parte hartzaile gehiago izan ditu. Giztira 20 lagun ausartu ziren irteera hartzera, tartean emakume bakarra. Iaz, esaterako, 12 partaide izan ziren. Karakate goian rre ikusle mordoa elkartu zen parte hartzaile saiatuak animatzeko. Eguraldi eguzkitsua egin arren, haize hotzak jotzen zuen goialdean, baina korrikalariek igarri ere ez zuten egin.

Morkaiko Mendizale Elkarteko eta Urgazi Triatloi Taldeko antolatzaileek gernikarrari eman zioten txapela. Cuadradok hasieratik erakutsi zuen bere nagusitasuna, baina ibilbidea ezagutzen ez zuenez, atzekoei begira egin zuen ia egoera guztia. Antena begiz ikusi zuenean bakarrik aurrera egitea erabaki zuen, ordea, eta biderik luzeena aukeratu ostean, Karakateko gurutzeraino desbideratu zen. Indarrez soberan zegoenez, errekuperatzea lortu eta Karakateko antenaren parean elkartu zen Susorekin, bertan bildutako ikusle mordoaren harridura eta ezusterako. Lehen emakumezkoa eta parte hartu zuen bakarra Pilar Arriola izan zen, 40'28'' denborarekin eta lehen beteranoa Juan Fernandez 40'22'' denborarekin.

Jose Mari Fernandez, elurretan ere nagusi Karakateko VI. igoeran
-Barren astekaria. 1999-XI-26
Jose Mari Fernandez elgoibartarrak Karakateko aldapa gogorrei neurria hartua diela erakutsi zuen joan zen zapatuan, hilaren 20an, ospatu zen Karakateko VI. Igoeran. 14 korrikalarik hartu zuten parte Urgazi Triatloi Taldeak Morkaiko Mendizale Taldearen laguntzaz antolatzen duen proban, baina Iñaki Kondek ezin izan zuen proba bukatu min hartu baitzuen hankan. Iaz, saltakarien etsai nagusia euria eta lainoa izan baziren, korrikalariak laino eta elur artetik agertzen ikustea ikusgarria izan da aurtengo igoeran, batez ere, tontorrean bildu ziren ikusleentzat.

Egin zuen eguraldia kontutan hartuz, “Suso”k marka bikaina egin zuen (32´30´´). Gogoan izan behar dugu igoeraren marka onena ere, Fernandezen esku dagoela duela 3 urte egindako denborari esker (29´43´´). Bigarren sailkatua Martin Dominguez izan zen, eta hirugarren Unai Bengoa eibartarra.

Suso erraz nagusitu zen Karakateko V. igoeran
-Barren astekaria. 1998-XI-20
  12 korrikalarik hartu zuten parte aurreko zapatuan izan zen Karakatera V. Igoeran. Hauetatik 9 lagun elgoibartarrak ziren eta gainontzekoak eibartarrak. Eguraldiak ez zuen batere lagundu eta euripean eta lainopean egin behar izan zuten partehartzaileek ibilibide osoa.

Aurrez espero zenaren kontra, iazko irabazlea izan zen Aldai eibartarrak ez zuen parte hartu. Hala ere, Karakatera saltaka igotzeak beti sortzen du ikusmina eta mendi tontorrean 25 lagunetik gora bildu ziren. Karakateko buzoira iritsi zen lehenengo partehartzailea Jose Mari Fernandez Suso izan zen. Honen atzetik bi eibartar iritsi ziren eta ondoren Iñigo Etxaniz, bigarren elgoibartarra."

Aldai eibartarra, Karakateko igoeran irabazle
-Barren astekaria. 1997-XI-21
  Joan den zapatuan jokatu zen Karakatera IV. igoeran Juan Aldai eibartarra izan zen Karakate gainera iritsi zen lehen korrikalaria. Ibilbideko zatirik gehiena bakarrik egin bazuen ere, denborarik onena egiteko gai izan zen, 29'59'', iazko errekorra baino 17 segundo gehiago.

    Jose Mari Fernandez Suso indarrik gabe geratu zen Karakateko maldetan. Aurreko asteko entrenamenduetan oso fin ibili bazen ere, duela hilabete batzuk izan zuen lesioak agian izan du zerikusirik. Datorren urtean, beharbada, bere esku dagoen errekorra hobetu ahal izango dute bai berak eta bai Aldai eibartarrak. Dena den, eta eguraldia apartekoa izan bazen ere, korrikalariak lur jota iritsi ziren ikuslez beteta zegoen mendi tontorrera. Aldai berak aitortu zuenez, "indarrik gabe iritsi naiz gora". Gainerako partehartzaileak ere ikaragarrizko esfortzua egin zuten lasterketa amaitzeko. Emakumezkoetan Pilar Arriola izan zen partaide bakarra. Bigarren urtez hartzen du parte elgoibartar gazte honek eta benetan pozik amaitu zuen lasterketa, "izan ere, nire marka bi minututan hobetu dut". Pilarrek bezela, Antonio Fernandez elgoibartar beteranoak ere, iazko marka hobetzea lortu zuen.

    Aipatzekoa da parte hartu zuten 11 korrikalarien artetik, lau kanpotarrak zirela."

Suso: 29'43"ko denbora jaitsi daiteke
-Barren astekaria. 1996-XI-22
Hamaika ikusteko jaioak garela esan ohi da, eta arrazoiarekin. Nork esango luke Plaza Handitik Karakateraino bitarteko aldapa gogorrak arnas-estuka igo eta gero, sprinterako indarrik geratuko zitzaienik lasterketa buruan zihoazen biei? Lasterketaren amaiera ikusteko Karakate gainera igo ziren zaletuak aho zabalik geratu ziren eibartarrak eta elgoibartarrak egin zuten denborarekin.

Sprintean

   Aldai eibartarrak Susoren errekorra hautsi zuen iaz, marka berria 30'50''an ezarriz.  Aurten Susok ez dio barkatu eibartarrari. Lasterketa osoan Aldai aurretik joan zen arren, Jose Mari Fernandez Susok aurrea hartu zion azken metroetan. "Hasieratik indartsu atera zen Aldai. Lasterketaren buruan jarri ginen biok. Estazioan trenbidea zeharkatzea pentsatuta nuen baina Karakoletik joateko esan ziguten antolatzaileek. Honez gain, Agarrera heltzean hesi bat itxita topatu genuen eta bion artean irekitzen saiatu ginen. Minutu erdi edo egongo ginen zeregin horretan. Hor denbora galdu izan ez bagenu marka hobe egingo genukeen. Ez nuen espero 29'43'' egiterik baina, hala ere, argi ikusi dut jaitsi litekeela".

   Juan Aldai eta Jose Mari Susoren arteko norgehiagokaz aparte, Karakatera Igoeraren III. edizioak izan zuen bestelakorik. Guztira 12 partehartzaile egon dira aurten. Oinezkoen txandarik ez zen egon, denak atera ziren 11etan. Elgoibar, Plazentzia eta Eibarko korrikalariek hartu zuen parte. Lehen aldiz, 50 urtetik gorako batek eta emakume batek korritu zuten.

Juan Aldaik errekorra hautsi zuen bidea ezagutu gabe
-Barren astekaria. 1995-XI-24
Eibartar bat, Juan Aldai mendizale ezaguna izan zen joan den larunbat goizean Karakate gainera iritsi zen lehen korrikalaria. Urgazik eta Morkaikok antolatutako Karakatera Igoeraren II. edizio honetan zazpi korrikalari baino ez ziren ausartu denboraren aurka, Karakateko malda gogorrak igotzera.

   Inork ez zuen espero iazko edizioan Jose Mari Fernandez Suso elgoibartarrak ezarritako 31 minutu eta 34 segunduko denbora hautsiko zuena eibartar bat izango zenik. Tontorrera heltzeko 30 minutu eta 50 segundo behar izan zituen eibartarrak, lehiakide guztiak ondo atzean laga zituelarik.

    "Ikaragarria", "como una moto" eta antzerakoak entzun zitezkeen Karakate gainean gainontzeko korrikalarien ahotan Aldaik egindako denboraren berri izan zutenean. Dena den, bigarren heldu zen Fernandez Susok ere, berea zen errekorra hautsi zuen 31'03''ko denbora eginez. Lasterketa hasieran Maiztegi, Suso eta Montes-ek erritmo bizia jarri zuten. Gainontzeko lau partehartzaileak atzetik zihoazen, irabazlea barne. Berasetara heltzean, ordeam lasterketari buelta eman zion eibartarrak. Elgoibarko partetik Karakatera igotzen zen lehen aldia izan arren, aurrea hartu zien eibartarrak lehen hirurei, mendian ondo baino hobeto moldatzen dakiela eta izugarrizko orientazio ona duela erakutsiz. Karakatera heltzena gainontzeko partaideek harrituta komentatzen zuten eibartarraren forma ona, bidezidor guztiak hartu beharrean, zati askotan gainera, pistatik igo baitzen.

   Eguraldi eskasa

   Eguraldiak ez zuen ikuskizuna ederragoa egiten gehiegi lagundu. Ikusle gutxi bildu zen Karakate tontorrean zazpi korrikalarien iritsiera txalotzeko. Joan-etorrian zebilen behe lainoak, euriak eta hotzak gogorragao bihurtu zuen igoera. Dena den, hotzagatik edo batek daki zergatik, iaz egindako denborak jaistea lortu zuten korrikalariek."

Karakateko erregeak
-Barren astekaria. 1994-XI-25
Jose Mari Fernandez Suso korrikalariak 1980. urtean Pedro Etxeberria Mantxillak lortutako errekorra "desegin" zuen joan den larunbatean Karakateko aldapa gogorrak 31 minutu eta 34 segundutan igo baitzituen. Jendez gainezka zegoen Karakateko gaina Fernandez noiz helmigaratuko zain.

   Plaza Handiko frontoitik Karakateko buzoira dauden bi kilometro t´erdiak Mantxillak baino ia zazpi minutu gutxigotan burutzea lortu zuen Jose Mari Fernandezek. Esfortzuak eragindako sufrimendua aurpegian igartzen zitzaiolarik iritsi zen helmugara bertara igo zen makina bat herritarren harriduraren artean. Atzetik Fernandezek jarritako erritmo gogorrari eutsi ezin izan zion Jose Felix Iglesias heldu zen eta hirugarren Jose Antonio Agote. Lehendabizikoz burutu den lasterketa honetan 11 herritarrek hartu zuten parte. Lehen edizio honen arrakaste ikusita Urgazi Triathloi Taldeak eta Morkaikok datorren urtean berriz ere Karakateko igoera antolatzeko asmoa agertu dute."